ஆத்மாநாம்
ஏதாவது செய் ஏதாவது செய்
உன் சகோதரன்
பைத்தியமாக்கப்படுகிறான்
உன் சகோதரி
நடுத்தெருவில் கற்பிழக்கிறாள்
சக்தியற்று
வேடிக்கை பார்க்கிறாய் நீ
ஏதாவது செய் ஏதாவது செய்
கண்டிக்க வேண்டாமா
அடி உதை விரட்டிச் செல்
ஊர்வலம் போ பேரணி நடத்து
ஏதாவது செய் ஏதாவது செய்
கூட்டம் கூட்டலாம்
மக்களிடம் விளக்கலாம்
அவர்கள் கலையுமுன்
வேசியின் மக்களே
எனக் கூவலாம்
ஏதாவது செய் ஏதாவது செய்
சக்தியற்று செய்யத் தவறினால்
உன் மனம் உன்னைச் சும்மா விடாது
சரித்திரம் இக்கணம் இரண்டும் உன்னை
பேடி என்றும்
வீர்யமிழந்தவன் என்றும்
குத்திக் காட்டும்
இளிச்சவாயர்கள் மீது
எரிந்து விழச் செய்யும்
ஆத்திரப்படு
கோபப்படு
கையில் கிடைத்த புல்லை எடுத்து
குண்டர்கள் வயிற்றைக் கிழி
உன் சகவாசிகளின் கிறுக்குத் தனத்தில்
தின்று கொழிப்பவரை
ஏதாவது செய் ஏதாவது செய்
* Do Something என்ற குந்தர் க்ராஸ் கவிதையை முன்னோடியாகக் கொண்டு எழுதப்பட்டது. க்ராஸின் கவிதை அடிப்படையில் மிகவும் கிண்டலானது. ஆத்மாநாமின் கவிதை தீவிரத்தையே தொனியாகக் கொண்டது.
குறிப்பு: நல்ல இலக்கியம் எல்லோரையும் சென்றடைய வேண்டும் என்ற நோக்கத்திலேயே இங்கு பதியப்படுகிறது. வேறு வணிக நோக்கம் எதுவுமில்லை. இதில் யாருக்கேனும் ஆட்சேபனை இருந்தால் தெரியப்படுத்தவும். அவற்றை நீக்கிவிடுகிறேன். படைப்புகளின் காப்புரிமை எழுத்தாளருக்கே
3 கருத்துகள்:
ஏதாவது செய்! ஏதாவது செய்! என்று வெறுமனே கிளப்பிக் கொண்டிருந்தால் மட்டும் போதாது. கிளம்பவும் வேண்டும்!
தன்னிடமிருந்து ஆரம்பிக்காத எதுவுமே இப்படி மொட்டைக் கவிதையைத் தான் நிற்கும்!
மொட்டைக் கவிதையாய்த்தான் ....என்று இருக்க வேண்டும்.
எதாவது செய் ஏதாவது செய் என்று அவசரப்படுத்தினதாலோ என்னவோ,தட்டச்சு செய்வதிலும் கூடப் பிழை!
இவ்வளவு அவலங்களுக்கும் பார்வையாளனாய் இருந்து கொண்டு செய் செய். அதை செய். இதை செய். என்றெல்லாம் வெறுமனே சொல்லிக் கொண்டிருக்கிறான். ஒரு இடத்திலாவது நான் அல்லது என்னைப்போல் என்று தன்னிலை செய்தி இல்லவே இல்லை. விவரிப்பதும் வீரம் 'பேசுவதும்' தூண்டி விடுவதுமாகத்தன் இருக்கிறான். தள்ளி விட்டு நிற்கிறான். தள்ளி நிற்கிறான். இன்று பெரும்பாலானோர் இப்படித்தானே இருக்கிறார்கள். குறிப்பாக தலைவர்கள்.
ரமேஷ் கல்யாண்
Post a Comment
இந்த படைப்பைப் பற்றிய உங்கள் கருத்துகள் மற்றவர்களுக்கு வழிகாட்டியாக இருக்கலாம். அதனால் நீங்கள் நினைப்பதை இங்கு பதியவும். நன்றி.